انڈے کو غذائیت سے بھرپور غذا تصور کیا جاتا ہے۔ ماہرینِ غذائیت کے مطابق روزانہ مناسب مقدار میں انڈا کھانے سے جسم کو اعلیٰ معیار کا پروٹین سمیت متعدد اہم غذائی اجزا مل سکتے ہیں، جو مجموعی صحت کیلئے مفید ہیں۔
انڈے میں موجود اعلیٰ معیار کا پروٹین پٹھوں کی نشوونما اور انہیں مضبوط رکھنے میں مددگار ثابت ہوتا ہے، جبکہ جسمانی توانائی برقرار رکھنے میں بھی کردار ادا کرتا ہے۔
انڈے میں کولین نامی اہم غذائی جزو بھی پایا جاتا ہے، جو دماغی افعال اور یادداشت کیلئے اہم سمجھا جاتا ہے۔
انڈے کی زردی میں موجود لوٹین اور زیکسانتھن اینٹی آکسیڈنٹس آنکھوں کی صحت کیلئے مفید ہیں اور عمر کے ساتھ بینائی سے متعلق بعض مسائل کے خطرے کو کم کرنے میں مدد دے سکتے ہیں۔
ناشتے میں انڈا کھانے سے پیٹ دیر تک بھرا رہنے کا احساس ہوسکتا ہے، جس سے غیر ضروری اسنیکنگ کم کرنے اور وزن کو متوازن رکھنے میں مدد مل سکتی ہے۔
انڈوں میں موجود غذائی اجزا دل کی صحت کیلئے بھی اہم ہیں، تاہم مجموعی غذا اور فرد کی صحت کے مطابق انڈے کی مقدار مختلف ہوسکتی ہے۔
اس کے علاوہ انڈے میں موجود وٹامن ڈی کیلشیم کے جذب اور ہڈیوں و دانتوں کی صحت میں اہم کردار ادا کرتا ہے۔
