کتے کے کاٹنے یا نوچنے کے بعد ریبیز ایک خطرناک اور جان لیوا بیماری بن سکتی ہے، اس لیے ماہرین نے متاثرہ افراد کو ویکسین اور طبی امداد میں تاخیر نہ کرنے کی ہدایت کی ہے۔
ماہرین کے مطابق ریبیز وائرس عموماً متاثرہ جانور کے تھوک کے ذریعے کاٹنے، خراش یا زخمی جلد پر تھوک لگنے سے انسان میں منتقل ہوسکتا ہے۔ کتے کے کاٹنے کے بعد ریبیز سے بچاؤ کی ویکسین جتنی جلد ممکن ہو لگوانی چاہیے، اور بہتر ہے کہ متاثرہ شخص پہلے 24 گھنٹوں کے اندر طبی مرکز سے رجوع کرے۔
تاہم اگر 24 گھنٹے گزر چکے ہوں تو اس کا مطلب یہ نہیں کہ ویکسین بے فائدہ ہوگئی ہے۔ طبی ماہرین کے مطابق ایسی صورت میں بھی مزید تاخیر کیے بغیر طبی امداد حاصل کرنی چاہیے۔
ریبیز کی علامات ظاہر ہونے میں کئی ہفتے یا اس سے بھی زیادہ وقت لگ سکتا ہے۔ بخار، بے چینی، الجھن، اشتعال، ہذیان اور بعد میں فالج جیسی علامات ظاہر ہونے کے بعد بیماری تقریباً ہمیشہ مہلک ثابت ہوتی ہے، اسی لیے علامات کا انتظار کرنا خطرناک ہوسکتا ہے۔
کتے کے کاٹنے کے فوراً بعد کیا کریں؟
زخم کو فوری طور پر صابن اور بہتے پانی سے کم از کم 15 منٹ تک اچھی طرح دھونا چاہیے۔ اس کے بعد مناسب جراثیم کش محلول استعمال کیا جاسکتا ہے۔
اگر خون بہہ رہا ہو تو صاف کپڑے سے دباؤ ڈال کر خون روکنے کی کوشش کی جائے، جبکہ زخم کو خود سے مضبوطی سے بند یا سیل نہیں کرنا چاہیے۔ ٹانکے لگانے کا فیصلہ طبی ماہر کرے۔
زخم دھونے کے بعد متاثرہ شخص کو فوری طور پر قریبی اسپتال یا طبی مرکز جانا چاہیے تاکہ ڈاکٹر زخم اور جانور کی صورتحال کا جائزہ لے کر ریبیز سے بچاؤ کے مناسب علاج کا فیصلہ کرسکے۔
ریبیز ویکسین کی خوراکوں کا شیڈول مریض کی صورتحال، سابقہ ویکسینیشن اور طبی تشخیص کے مطابق مختلف ہوسکتا ہے، اس لیے ویکسین کی خوراک اور شیڈول ڈاکٹر کی ہدایت کے مطابق مکمل کرنا ضروری ہے۔
