عالمی شہرت یافتہ امریکی گلوکارہ بلی ایلش نے موسیقی کی دنیا میں کامیابیوں کے بعد اب ہالی ووڈ میں اداکاری کا آغاز کر دیا ہے۔ ان کی پہلی فلم "دی بیل جار" (The Bell Jar) کی شوٹنگ کے دوران لی گئی تصاویر سوشل میڈیا پر وائرل ہو گئی ہیں، جن میں ان کا نیا روپ مداحوں کی توجہ کا مرکز بن گیا ہے۔
غیر ملکی میڈیا رپورٹس کے مطابق بلی ایلش فلم میں ایسٹر گرین ووڈ کا مرکزی کردار ادا کر رہی ہیں، جو معروف امریکی شاعرہ اور ناول نگار سلویا پلاتھ کے مشہور ناول The Bell Jar پر مبنی ہے۔
وائرل تصاویر میں بلی ایلش سرخی مائل بھورے بال، شوخ سرخ لپ اسٹک اور 1950 کی دہائی سے متاثر کلاسک ملبوسات میں نظر آ رہی ہیں، جس کی وجہ سے انہیں پہلی نظر میں پہچاننا بھی مشکل ہو رہا ہے۔
فلم کی ہدایت کاری آسکر ایوارڈ یافتہ کینیڈین ہدایت کارہ سارہ پولی کر رہی ہیں، جبکہ شوٹنگ کینیڈا کے شہر ٹورنٹو میں جاری ہے۔ مداح اب بے صبری سے انتظار کر رہے ہیں کہ بلی ایلش اداکاری کے میدان میں بھی اپنی صلاحیتوں کا کس حد تک لوہا منواتی ہیں۔
