جماعت اسلامی نے اسلام آباد کی جانب لانگ مارچ اکتوبر کے پہلے ہفتے تک مؤخر کرنے کا اعلان کردیا ہے۔ امیر جماعت اسلامی حافظ نعیم الرحمٰن نے کہا ہے کہ پارٹی احتجاج اور لانگ مارچ سے دستبردار نہیں ہوگی۔
ملتان میں میڈیا سے گفتگو کرتے ہوئے حافظ نعیم الرحمٰن نے کہا کہ جماعت اسلامی پہلے بھی احتجاج اور ملک بھر میں دھرنے دے چکی ہے۔ ان کے مطابق حکومت سے عوامی ریلیف کے معاملے پر بات چیت بھی ہوئی ہے۔
حافظ نعیم الرحمٰن کا کہنا تھا کہ وزیراعظم شہباز شریف نے وطن واپس آکر جماعت اسلامی سے مل کر عوام کو ریلیف دینے کی یقین دہانی کرائی ہے۔ ان کے مطابق مشاورت کے بعد لانگ مارچ کو اکتوبر کے پہلے ہفتے تک مؤخر کرنے کا فیصلہ کیا گیا ہے، تاہم احتجاج ختم نہیں کیا جائے گا۔
انہوں نے کہا کہ اگر حکومت عوام کو ریلیف فراہم کرتی ہے تو صورتحال پر دوبارہ غور کیا جائے گا، بصورت دیگر جماعت اسلامی اکتوبر میں لانگ مارچ کرے گی۔
اس سے قبل وزیراعظم شہباز شریف نے حافظ نعیم الرحمٰن سے ٹیلیفون پر رابطہ کرکے مارچ مؤخر کرنے کی درخواست کی تھی۔ جماعت اسلامی کے مطابق وزیراعظم نے وطن واپسی پر جماعت کے ساتھ ملاقات اور عوام کیلئے بہتر ریلیف پیکیج پر بات کرنے کی یقین دہانی کرائی۔
