خیبرپختونخوا کی گلیات ڈویلپمنٹ اتھارٹی (GDA) میں مبینہ بے ضابطگیوں اور قواعد و ضوابط کی خلاف ورزی کے الزام میں 7 اہلکاروں کو 120 روز کے لیے معطل کر دیا گیا ہے۔
محکمانہ ذرائع کے مطابق ابتدائی تحقیقات کے بعد معطلی کا فیصلہ کیا گیا، جبکہ متعلقہ اہلکاروں کے خلاف باقاعدہ محکمانہ کارروائی بھی شروع کر دی گئی ہے۔
حکام کا کہنا ہے کہ معطل کیے گئے اہلکاروں کو جلد چارج شیٹ اور ان پر عائد الزامات کی تفصیلات فراہم کی جائیں گی تاکہ محکمانہ کارروائی کو قانونی تقاضوں اور قواعد کے مطابق آگے بڑھایا جا سکے۔
محکمانہ احکامات کے تحت تمام معطل اہلکاروں کو فوری طور پر متعلقہ دفتر میں رپورٹ کرنے کی ہدایت جاری کی گئی ہے، جبکہ انکوائری مکمل ہونے تک مزید انتظامی اور قانونی کارروائی جاری رہے گی۔
