امریکی وفاقی تحقیقاتی ادارے ایف بی آئی نے خبردار کیا ہے کہ شمالی کوریا سے منسلک ہیکرز نے گزشتہ 18 ماہ کے دوران 40 کروڑ ڈالر سے زائد مالیت کی کرپٹو کرنسی چوری کی ہے۔ اس سائبر مہم میں ہیکرز نے جعلی ویڈیو کالز اور قابلِ اعتماد افراد کی شناخت استعمال کرکے متاثرین کو نشانہ بنایا۔
خبر رساں ادارے رائٹرز کے مطابق ایف بی آئی نے اس طریقہ کار کو ’’فیس اسٹیلر‘‘ قرار دیا ہے۔ اس میں ہیکرز پہلے کسی شخص کے سوشل میڈیا یا رابطے کے اکاؤنٹ تک غیرقانونی رسائی حاصل کرتے ہیں اور پھر اس کی شناخت استعمال کرتے ہوئے اس کے جاننے والوں کو ویڈیو میٹنگ کی دعوت بھیجتے ہیں۔
متاثرہ شخص کو زوم، مائیکروسافٹ ٹیمز یا گوگل میٹ جیسے پلیٹ فارم سے ملتے جلتے جعلی لنک کے ذریعے کال میں شامل کیا جاتا ہے۔ کال کے دوران ایک فرضی تکنیکی خرابی ظاہر کی جاتی ہے اور صارف سے کہا جاتا ہے کہ وہ مسئلہ حل کرنے کے لیے ایک مخصوص لنک پر کلک کرے۔ اس لنک کے ذریعے کمپیوٹر یا اکاؤنٹ میں نقصان دہ سافٹ ویئر داخل کیا جا سکتا ہے۔
ایف بی آئی کے مطابق ہیکرز نہ صرف متاثرہ افراد بلکہ ان کے رابطوں کو بھی اگلے حملوں کے لیے استعمال کرتے ہیں۔ ادارے نے 900 سے زائد متاثرین کی ویب کیم ویڈیوز کی نشاندہی اور ضبطی کا بھی ذکر کیا ہے۔ مزید یہ کہ ہیکرز مصنوعی ذہانت کی مدد سے معروف کرپٹو اور بلاک چین شخصیات کی جعلی ویڈیوز بنانے کی کوشش بھی کر رہے ہیں۔
ماہرین کے مطابق اس واقعے سے ظاہر ہوتا ہے کہ سائبر جرائم اب صرف مشکوک ای میلز یا غیرمعروف ویب سائٹس تک محدود نہیں رہے۔ قابلِ اعتماد شخص کی ویڈیو کال بھی دھوکا دہی کا ذریعہ بن سکتی ہے۔ صارفین کو چاہیے کہ کسی بھی غیرمتوقع لنک، سافٹ ویئر اپ ڈیٹ یا اکاؤنٹ کی تصدیق کی درخواست پر عمل کرنے سے پہلے اس کی الگ سے تصدیق کریں۔
